Minister di Hustisia, sra Magali Jacoba, ta sumamente satisfecho i orguyoso ku e resultado di e negosiashonnan firme i intenso ku ta tin ku Hulanda riba tereno di hustisia, pero muy en partikular riba tereno di polis. E resultado aki ta pone un base sólido i duradero pa por realisá su mishon di maneho ”hustisia tei p’ami, p’abo i pa nos tur”.Aprobashon den parlamentu Hulandes di e leinan di konsenso riba tereno di hustisia ta marka dos resultado krusial pa e pueblonan di Kòrsou, St. Maarten, Bonaire, Saba i St. Eustatius: Esun promé ta ku a logra di garantisá kontinuashon di e koperashon den kombatimentu di kriminalidat organisá i kriminalidat internashonal ku ta usa nos islanan komo trampolin.Pero e logro mas importante ta ku ta keda ankra den lei ku kuerpo polisial di Kòrsou i di St. Maarten lo por sigui desaroyá den kuerponan kompleto ku por karga responsabilidat outónomo riba ehekushon di tur tarea polisial pa kombatí kriminalidat, inkluso kriminalidat internashonal i kriminalidat organisá.Ku e logronan aki kaminda a habri pa por “kaba e trabou” tambe riba tereno di hustisia i di polis en partikular.

Minister Jacoba biahando ku konvikshon pa Hulanda

Willemstad - Ku siguridat ku e negosashonnan di ultimo lunanan a yega na algun lei di konsenso riba tereno hudisial ku ta brinda un outonomia maksimo pa Korsou i Sint Maarten, Minister di Hustisia a biaha pa Hulanda djaweps 8 di aprel pa termina e trayekto largu di negosashon.

Riba dianan 9, 12, 14 i 15 di aprel proksimo Tweede Kamer di Hulanda ta atende un pakete grandi di leinan ku ta hasi tantu e desmantelashon di Antia Hulandes posibel i tambe engrandesementu di e Reino hulandes ku dos pais outonomo mas. Un gran parti di e pakete ta regarda leinan di konsenso di Reino ku na su turno ta atende orden publiko, esakinan ta Lei di Reino tokante Hof van Justitie, Lei di Reino Ministerio Publiko di Korsou, Sint Maarten i di e islanan BES, tambe Lei di Reino Polis di Korsou, Sint Maarten i islanan BES i Lei di Reino Konseho di Orden Publiko.

Adelantando riba e postulashon ofisial di e proposishon di lei, a traha duru den e ultimo lunanan , na un asina yama “inrichtingsplan” pa por ehekuta e leinan di konsenso di Reino. E plan aki a demostra ku ta posibel pa ehekuta e leinan di konsenso di Reino na un kantidat grandi. Banda di esaki tambe a demostra ku tin posibilidat, si tin deseo pa esaki, pa koperashon entre e paisnan nobo den Reino.

Minister Jacoba ta biaha pa Hulanda ku e konvikshon pa defende resultadonan di negosashonnan ku a tuma luga i ku a pone ku por yega na paisnan nobo den Reino. Un ehekushon konsistente di e kuater leinan di konsenso ta sigura ku komunidat di e dos paisnan nobo den Reino den termino largu por bisa ku; “hustisia tei p’ami,p’abo,pa nos tur!”

Minister Jacoba trahando riba un “Bureau Integriteit Politie”

Fortifikashon di integridat den ehersementu di labor di kada kolaboradó den e kadena hudisial ta un di e kriterionan mas importante pa Minister di Hustisia den su maneho pa realisá su meta ku ta “Hustisia tei p'ami, p' abo i pa nos tur!”.

Fortifikashon di integridat ta nifiká ku den promé instansha ta akapará direktorado di kada instituto den e kadena hudisial ku hèrmèntnan nesesario pa kumpli ku nan tarea den e área di integridat. Mas importante ainda e fortifikashon aki ta nifiká di un banda ku ta bin un lugá sentral kaminda komunidat i personal den e kadena hudisial por hasi denunsia riba práktikanan kontra integridat den e aparato hudisial i di otro banda mester bin un organisashon ku ta promové i stimulá mantenshon di integridat den aktividatnan polisial.

Integridat ta konta pa tur ámtenar, pero pa polis integridat tin mas peso. E polis ta funshoná a base di un posishon di outoridat ku gobièrnu ta konfi’é kuné pa mantené órden públiko. Esaki ta eksigí ku kada funshonario di polis individual mester tin un habilidat pa husga na kada momentu riba derechi, nesesidat i deseo di kada persona ku nan ta sirbi. Tambe e ta eksigí di kada funshonario di polis e forsa nesesario pa resistí e preshon di otronan ku ke influensha su manera di funshoná ku despues por akusá e funshonario aki di falta di integridat i abusu di poder. E nivel di integridat den e kuerpo polisial ta di sumo importansha pa e desaroyo di un sentido di siguridat serka komunidat i asina nan por eksperensha “Hustisia tei p'ami, p’abo, pa nos tur!”

Ounke den ehersementu di labor ta trata di komportashon íntegro i funshonamentu moral di e funshonario, tin segun Minister Magali Jacoba regla, norma i stándartnan nesesario pa asina midi si kada funshonario ta komportá su mes na un manera íntegro. Aki ta konta primordialmente e formashon moral i tambe teniendo kuenta ku e nesesidatnan i deseonan di kada persona enbolbí.

E gran eskala ku e kuerpo polisial ta i ku tin ku funshoná den un komunidat chikitu ta eksigí atenshon speshal pa e organisashon di un maneho dirigí riba e promoshon i fasilitashon di un funshonamentu íntegro di kada funshonario polisial. E organisashon aki, segun Minister Jacoba, ta basa riba dos pilar: akshon i komportashon íntegro i tambe mantenshon di un funshonamentu íntegro den labornan diario.

Pa loke ta e di dos punto, ta trata aki di resistí tentashon, kòntròl riba mantenshon di regla i duna sanshonnan ora ta kibra ku reglanan di integridat.

Den kuadro di su maneho, Minister Magali Jacoba a tene resientemente un reunion ku sr. Bas van Delden,Hefe di Bureau Integriteit di munisipio di Amsterdam, sr. Bart Hofstee Konsehero di Bureau Integriteit Amsterdam i sra. Melinda van Alstede-Whyte direktora di DMC lokal pa wak e posibilidatnan

Pa lanta un Bureau Integriteit KPC apart. Huntu a yega na e konklushon ku un instansha asina no solamente ta nesesario pero tambe por ta faktibel den un tèrmino korto.

Sentenares di empleadonan ta partisipa
Minister di Hustisia Magali Jacoba ta organisa enkuentro informativo pa kolaboradonan

Willemstad- Desmantelashon di e tareanan den e kadena hudisial ta den un estado hopi avansa. Manera ya anunsia, dia 15 di mart 2010 ya algun departamentu a pasa pa Teritorio Insular di Korsou. Dia 1 di aprel lo bai tin mas departamentu ku tambe ta pasa den e proseso aki esta e traspaso pa Teritorio Insular.

Naturalmente ku kambio ta bin preokupashon entre esnan ku ta labora den e sektor aki, spesialmente esnan ku ta trahando den e departamentunan ku ya kaba ta den e proseso aki.

Netamente pa e motibu aki Minister di Hustisia sra. Magali Jacoba a pidi pa organisa un seshon di informashon pa e kolaboradonan den e kadena hudisial. Esaki ta pa duna nan e oportunidat risibi informashon serka e diferente ekspertonan i tambe hanja e oportunidat pa hasi pregunta. Esaki ku e meta pa trese trankilidat serka e kolaboradonan.

Na e seshon aki, ku a tuma luga dia 29 di mart 2010 na e edifisio di New Song na Muizenberg, a hiba palabra Minister di Hustisia sra. Magali Jacoba pa duna bon bini i splika kiko ta e intenshon di e seshon di informashon. Despues a hiba palabra sr. Geomali Martis den kalidat di presidente di Projectorg Ontmanteling Land Nederlandse Antillen. Sr. Martis a splika hinter e trayekto di struktura estatal for di prinsipio te ku e situashon aktual.

Alvin Daal tambe a hiba palabra komo un di e personanan enkarga ku e proseso di desmantelashon di e kadena hudisial. Sr. Daal a toka tres punto ku ta desmantelashon, konstrukshon i trayekto di mehorashon di e departamentunan den e kadena hudisial. Sr. Daal a bai mas den detaye di hinter e trayekto di desmantelashon i kiko spesifikamente esaki ta nifika pa e kolaborado ku ta pasa pa Teritorio Insular di Korsou.

Despues di e informashon a duna oportunidat na kada persona presente pa hasi pregunta.

Dia 26 di mart 2010 tabata un dia grandi kaminda a huramenta dilanti Gobernador, e lastu gobiernu di Antia, Gabinete De Jongh-Elhage II. Ami a huramenta komo Minister di Hustisia pa sirbi e pueblo Antiano.

Bon Bini

Bon bini na mi blog personal komo Minister di Hustisia pa Antias. Di e manera aki mi ker ta konstantemente ta den kontakto ku komunidat p'asina mi por haña informashon, keho, feedback i konseho di boso ku mi ta sirbi.

E lema di mi maneho ta "Hustisia tei p'ami, p'abo, pa nos tur!". Pero pa e lema aki por funshona, abo mester por tin e posibilidat di ta den kontakto ku mi na un manera simpel i lihe. Pa e motibu aki mi a krea mi blog kual netamente ta dunabo e oportunidat aki.

Tambe mi ta publika mi aktividatnan mas importante riba e blog aki pami por mantenebo debidamente informa.

Mi ta spera bo hasi bon uso di e oportunidat aki pa huntu nos kumpli ku e lema hustisia tei pa nos tur.

Magali Jacoba